करोना लस दिल्यानंतर एलर्जी; जाणून घ्या लक्षणे

लंडन: ब्रिटनमध्ये सुरू असलेल्या करोना लसीकरणात दोघांची प्रकृती बिघडल्यामुळे चिंतेचे वातावरण निर्माण झाले आहे. ब्रिटीश नियामक प्राधिकरणाने ही बाब गांभीर्याने घेतली आहे. लस घेतलेल्या दोघांची प्रकृती बिघडल्यानंतर प्रशासनाने निर्देश जारी केले असून एलर्जी असलेल्या लोकांनी लस न घेण्याचे आवाहन केले आहे

ब्रिटनमध्ये मंगळवारपासून करोना लसीकरण मोहिमेस सुरुवात करण्यात आली आहे. आतापर्यंत फक्त दोघांचीच प्रकृती बिघडली असल्याचे समोर आले आहे. लस सुरक्षित असल्याची खात्री झाल्यानंतरच फायजरच्या लशीला मंजुरी दिली असल्याचे ब्रिटनच्या आरोग्य विभागाने सांगितले. आतापर्यंत दोघांनाच लसीमुळे त्रास झाला असून इतरांना कोणताही त्रास झाला नसल्याचेही त्यांनी स्पष्ट केले.

फायजरने काय म्हटलं?

ही लस फायजर-बायोएनटेकने संयुक्तपणे विकसित केली आहे. लस चाचणी दरम्यान औषधांची एलर्जी असलेल्या स्वयंसेवकाचा समावेश करण्यात आला नव्हता. लस, औषधांची एलर्जी सगळ्यांनाच असू शकत नाही, असे तज्ज्ञांनी म्हटले आहे. फायजर-बायोएनटेकने लस चाचणीच्या आधारे ब्रिटनने लस सुरक्षित असल्याची खात्री केल्यानंतर मंजुरी दिली आहे. लस घेतलेल्यांची संख्या वाढल्यानंतर एलर्जी असलेल्यांची संख्या वाढण्याची शक्यता असल्याचे तज्ज्ञांनी म्हटले आहे.

एलर्जी कशामुळे?

तज्ज्ञांनी म्हटले की, गेलाटिन अथवा एग प्रोटीनचा काहींना त्रास होऊ शकतो. ज्यांना अंड्याची एलर्जी आहे, त्यांनादेखील लस न घेण्याचा सल्ला दिला आहे. ही लस तयार करण्यात कोंबडीच्या अंड्याचा वापर केला आहे. लस घेतल्यानंतर होणाऱ्या एलर्जीची लक्षणे सामान्य आहेत. यामध्ये शरीरावर वण्र उठणे, त्वचेची जळजळ होणे, खोकला, श्वास घेण्यास त्रास होणे आदी लक्षणे जाणवू शकतात.

लस घेतल्यानंतर दुष्परिणामामुळे ज्या हातावर लस टोचली आहे, तो हात दुखणे, ताप येणे, मांसपेशी दुखणे आदी लक्षणे आढळतात. फायजरच्या लस चाचणीत काही स्वयंसेवकांना त्रास झाला होता. लस दिलेल्यांपैकी काहींना थकवा येणे, डोके दुखी, थंडी वाजणे आदी त्रास झाला. लस टोचल्यानंतर दिसून येणारी एलर्जी ही कमी प्रमाणात आणि अल्पकाळासाठी आढळून येते.

इतर गंभीर लक्षणे काय असू शकतात?

लस टोचल्यानंतर कोणती गंभीर लक्षणे आढळू शकतात, याबाबत आता चर्चा सुरू आहे. गंभीर लक्षणे ओळखण्याबाबत काही दिवसांचा अवधी जाण्याचा शक्यता आहे. ब्रिटनमध्ये टप्प्याटप्प्याने लस देण्यात येणार आहे. सुरुवातीच्या टप्प्यात आरोग्य कर्मचारी, वृद्ध मंडळींना लस देण्यात येणार आहे. त्याशिवाय करोनामुळे गंभीर आजारी असलेल्या बाधितांनाही प्राथमिकता देण्यात आली आहे.