काँग्रेस अध्यक्ष सोनिया गांधी गोव्यात

नवी दिल्ली : राजधानीतील हवा प्रदूषणामुळे डॉक्टरांच्या सल्ल्यानुसार काँग्रेस अध्यक्ष सोनिया गांधी शुक्रवारी काही दिवसांसाठी गोव्यात दाखल झाल्या. राहुलही त्यांच्यासोबत आहेत. ‘सोनिया यांना अस्थमाचा त्रास आहे. शिवाय, छातीत संसर्ग आहे. डॉक्टरांनी त्यांना काही दिवस दिल्लीत न राहण्याचा सल्ला दिला आहे. त्यामुळे, त्या गोव्यात गेल्या असून, दिल्लीतील हवेची गुणवत्ता सुधारल्यानंतर त्या परत येतील,’ असे पक्षातील एका ज्येष्ठ नेत्याने नाव जाहीर न करण्याच्या अटीवर सांगितले.

काँग्रेसकडून तीन समित्यांची स्थापना

दरम्यान, गलथानपणाने ग्रासलेल्या काँग्रेसच्या कार्यपद्धतीवर दररोज पक्षातील नेत्यांकडूनच होणारे हल्ले रोखण्याच्या उद्देशाने काँग्रेस अध्यक्ष सोनिया गांधी यांनी शुक्रवारी माजी पंतप्रधान डॉ. मनमोहन सिंग यांच्या अध्यक्षतेखाली तीन समित्या स्थापन केल्या. देशाच्या आर्थिक, परराष्ट्र आणि राष्ट्रीय सुरक्षेशी संबंधित धोरणांवर विचार आणि चर्चा करण्यासाठी स्थापन करण्यात आलेल्या या समित्यांमध्ये गुलामनबी आझाद, पी. चिदंबरम, आनंद शर्मा, शशी थरूर, दिग्विजय सिंह, वीरप्पा मोईली, जयराम रमेश या काँग्रेसच्या ‘उपद्रवी’ नेत्यांना प्रामुख्याने स्थान देण्यात आले असून, आक्रमक कपिल सिब्बल यांना बाहेर ठेवण्यात आले आहे.

‘उपद्रवी’ नेत्यांचे दैनंदिन हल्ले रोखण्यासाठी पाऊल

डॉ. मनमोहन सिंग यांच्या अध्यक्षतेखाली अर्थविषयक समितीमध्ये माजी अर्थमंत्री पी. चिदंबरम, मल्लिकार्जुन खरगे, दिग्विजय सिंह आणि निमंत्रक जयराम रमेश यांचा समावेश आहे. परराष्ट्र धोरणविषयक समितीमध्ये माजी केंद्रीय मंत्री आनंद शर्मा, शशी थरूर आणि लोकसभेचे खासदार सप्तगिरी सांका उलका यांचा समावेश आहे. माजी परराष्ट्रमंत्री सलमान खुर्शीद या समितीचे निमंत्रक असतील. राष्ट्रीय सुरक्षेवरील समितीमध्ये राज्यसभेतील विरोधी पक्षनेते गुलामनबी आझाद, माजी केंद्रीय मंत्री वीरप्पा मोईली, मेघालयाचे खासदार व्हिन्सेंट पाला आणि पुडुचेरीचे माजी मुख्यमंत्री व लोकसभेचे खासदार व्ही. वैथिलिंगम यांचा समावेश करण्यात आला आहे. या समितीचे निमंत्रक व्हिसेंट पाला असतील. काँग्रेसचे राष्ट्रीय संघटन सरचिटणीस के. सी. वेणुगोपाळ यांनी एका प्रसिद्धी पत्रकाद्वारे या समित्यांच्या स्थापनेची माहिती दिली.