खळबळजनक! कचरा टाकल्याचा जाब विचारला; दोघांना चाकूने भोसकले

औरंगाबाद: कचरा टाकण्याचा जाब विचारणाऱ्या महिलेच्या पतीसह तिच्या दिराला चाकू भोसकून जीवे मारण्याचा प्रयत्न करणाऱ्यांना जिन्सी पोलिसांनी रविवारी रात्री अटक केली. हमीद महेमूद सय्यद (वय २९) व सय्यद महेमूद अमीर (वय ५०, रा. रहेमानिया कॉलनी) अशी त्यांची नावे असून त्यांना गुरुवारपर्यंत पोलिस कोठडीत ठेवण्याचे आदेश प्रथम वर्ग न्यायदंडाधिकारी ए. एस. वाडकर यांनी सोमवारी दिले.

या प्रकरणात शेख परवीन बेगम शेख फहीमोद्दीन (वय २५, रा. रहेमानिया कॉलनी) यांनी तक्रार दिली. शेख परवीन या पती, दीर, सासू सासऱ्यासह शेरुभाई यांच्या घरात भाडेकरू आहेत. त्यांचे पती बांधकाम मजूर असून त्यांच्या घराच्या शेजारील इमारतीत आरोपी हमीद सय्यद व त्याचे कुटुंब राहते. हमीद याची पत्नी अंजूम, तिची जाऊ आस्मा व परवीन यांच्यात कचरा टाकण्याच्या कारणावरून नेहमी वाद होत होता. नऊ ऑगस्ट रोजी सकाळी नऊ वाजता हमीदच्या पत्नीने परवीन यांच्या घरात कचरा टाकला. त्यामुळे परवीन या तिला समजाविण्यासाठी गेल्या असता अंजूम व तिची सासू जमिला यांनी मारहाण केली. परवीनने हे पतीला सांगितल्याने तिच्या पतीने दोघांना समजावून सांगून कामावर गेला. त्यानंतर जमिलाचा पती तथा आरोपी महेमूद हा परवीन यांच्या घरी आला, त्याच्या सोबत दोन जण होते. त्यांनी दरवाजाला लाथा मारल्या. त्यामुळे परवीन यांनी पतीला फोन करून बोलावून घेतले. पती घरी येताच महेमूद व त्याच्या साथीदारांनी त्यांना शिवीगाळ सुरू केली. मुलगा जावेद, हमीद व जावई इम्रान यांना बोलावून घेतले.

आरोपींनी परवीनच्या पतीला लाकडी दांड्याने मारहाण केली. त्यानंतर आरोपी हमीद, महेमूद व त्यांच्या दोन साथीदारांनी परवीन यांच्या पतीचे हात पकडले, तर जावेदने त्याच्या पोटात चाकू भोसकला. परवीनचा दिर नईम हा भांडण सोडविण्यासाठी आला असता त्याच्याही पोटात जावेदने चाकू भोसकला. दोघा भावांना उपचारासाठी घाटी रुग्णलयात उपचार सुरू आहे. या प्रकरणात जिन्सी पोलिस ठाण्यात सय्यद महेमूद (५०), सय्यद हमीद (२९), सय्यद जावेद (२६), जमीला महेमूद सय्यद (४७), अंजुम हमीद सय्यद (२५), समीना इमरान (२४), आसमा जावेद सय्यद (२२) व इम्रान (२७) या आठजणांवर गुन्हा दाखल करण्यात आला आहे.

शस्त्राचा शोध सुरू

पोलिसांनी तपास करून दोन आरोपींना अटक करून न्यायालयात हजर केले. आरोपींच्या ताब्यातून गुन्ह्यात वापरलेले शस्त्र जप्त करणे आहे. आरोपींच्या साथीदारांना देखील अटक करणे बाकी असल्याने आरोपींना पोलिस कोठडी देण्याची विनंती सहाय्यक सरकारी वकील गौतम कदम यांनी न्यायालयाकडे केली. ही विनंती मान्य करून न्यायालयाने कोठडीचे आदेश दिले.