कल्याणमध्ये मटका किंगची गोळ्या झाडून हत्या
ठाणे: कल्याण स्थानकाजवळ नीलम गल्ली येथे मटका किंग जिग्नेश ठक्कर याची गोळ्या झाडून हत्या केल्याची घटना शुक्रवारी मध्यरात्री घडली. या प्रकरणी महात्मा फुले चौक पोलिस ठाण्यात गुन्हा दाखल करण्यात आला असून धर्मेश नितीन शहा, जयपाल व अन्य दोन अनोळखी व्यक्तींचा पोलिस शोध घेत आहेत.
चार दिवसांपूर्वी आरोपी धर्मेश नितिन शहा याचा मित्र चेतन पटेल व जिग्नेश ठक्कर यांच्यामध्ये वादावादी व हाणामारी झाली होती. याबाबत बाजारपेठ पोलिस ठाण्यात चेतन पटेल याने जिग्नेश ठक्कर, सऊद शेख, मनीष चव्हाण यांच्या विरोधात अदखलपात्र तक्रार दाखल केली होती. तर, जिग्नेश ठक्कर याने चेतन पटेल याच्या विरोधात अदखलपात्र गुन्हा दाखल केला होता. यावरून धर्मेश याच्या मनात जिग्नेशबद्दल राग होता. या दोघांमध्ये पूर्वी आर्थिक वादही झाले होते. या वादातूनच मटका किंग जिग्नेशच्या छातीवर चार गोळ्या झाडून हत्या केल्याची माहिती पोलिसांनी सांगितली.
हा प्रकार घडल्यानंतर महात्मा फुले पोलिस घटनास्थळी पोहोचले. जिग्नेशला तातडीने फोर्टिज रुग्णालयात पाठविण्यात आले. परंतु डॉक्टरांनी जिग्नेशला मृत घोषित केले. जिग्नेश ठक्कर याचे कल्याण, उल्हासनगर आणि ठाणे परिसरात मटका आणि रमी क्लब असून तो क्रिकेट सामन्यावरही सट्टाबाजार करत असल्याची माहिती समोर आली आहे. या घटनेचा तपास पोलिसांची पाच पथके करीत आहेत.
