Coronavirus vaccine करोनाची लस अंतिम टप्प्यात; ‘इतकी’ असणार लशीची किंमत!

लंडन: जगभरात थैमान घालणाऱ्या करोनाच्या संसर्गाला अटकाव करण्यासाठी लस विकसित करण्याचे प्रयत्न सुरू आहेत. करोनावरील लस आता दृष्टीपथात आली असून काही लशींची अंतिम टप्प्यातील चाचणीही सुरू झाली आहे. तर, दुसरीकडे या लशी किंमत ठरवण्याबाबत अनेक देशांमध्ये विचार विनिमय सुरू झाला आहे.

जगभरातील लशींच्या समन्वयाचे काम करणाऱ्या ‘गावी वॅक्सीन अलायन्स’ने लशीच्या किंमती ठरवण्याबाबत आता पुढाकार घेतला आहे. जगभरात लशींचे वितरण योग्य पद्धतीने व्हावे यासाठी कोवॅक्स केंद्राचीही स्थापना करण्यात आली आहे. कोवॅक्स केंद्राचे सहप्रमुख आणि गावी वॅक्सीन अलायन्सचे सीईओ सेथ बर्कले यांनी करोना लशीची किंमत ४० डॉलर म्हणजे जवळपास तीन हजार रुपये ठेवणार असल्याची माहिती दिली. तर, गरीब देशांना यापेक्षाही कमी दरात लस देण्याबाबत विचार सुरू असल्याचेही त्यांनी सांगितले. युरोपीयन संघाच्या सूत्रांनुसार ही श्रीमंत देशांमध्ये ही लस ४० डॉलरमध्ये उपलब्ध होईल. कोवॅक्स योजनेशिवाय इतर मार्गाद्वारेही युरोपीयन संघ लस मिळण्याचे प्रयत्न करत आहे.

बर्कले यांनी सांगितले की, काही लशी चाचणीच्या टप्प्यात आहेत. अशा परिस्थितीत प्रत्येक लशीची किंमत वेगवेगळी असू शकते. लशीची किंमत ही लोकांना किती डोस द्यावे लागतील यावर ठरणार आहे. त्याशिवाय ही लस कोणत्या देशात कोणत्या परवानगीअंतर्गत अशा विविध गोष्टीही किंमत ठरवण्याबाबत महत्त्वाच्या ठरणार आहेत. लस निर्मात्यांसोबत मोठ्या प्रमाणावर लशीच्या डोसबाबत समन्वय करण्याचा प्रयत्न करत आहोत. लस वापरण्यास हिरवा झेंडा मिळताच त्याच्या किंमतीवरून गोंधळ होऊ नये यासाठी प्रयत्न सुरू असल्याचे त्यांनी सांगितले. गरीब देशांना स्वस्त दरात आणि श्रीमंत देशांमध्ये महाग किंमतीत लस उपलब्ध करून देण्याचा विचार होऊ शकतो.

जगभरात दोन अब्ज लशी वितरीत करण्याचा कोवॅक्सचा प्रयत्न आहे. पुढील वर्षापर्यंत आणखीही काही देश कोवॅक्सची जोडले जाणार असून आतापर्यंत ७५ देशांनी कोवॅक्ससोबत येण्याची इच्छा व्यक्त केली आहे. सध्या सुरू असलेल्या चाचणीनुसार करोनावरील लस विकसित झाल्यास प्रत्येक नागरिकाला किमान दोन वेळेस डोस घ्यावे लागतील अशी चिन्हं आहेत.

दरम्यान, ऑक्सफोर्ड विद्यापीठ आणि AstraZeneca ही कंपनी विकसित करत असलेल्या लशीची चाचणी अंतिम टप्प्यात आली आहे. भारतात या लशीचे उत्पादन सिरम इन्स्टिट्यूट करणार आहे. ही लस एक हजार रुपयांपेक्षाही कमी किंमतीत भारतात उपलब्ध करून देण्याचा प्रयत्न असल्याचे सिरमचे अध्यक्ष सायरस पुनावाला यांनी सांगितले.