तुम्ही स्मोकिंग करता का?; आरोग्य मंत्रालयाने करोनाबाबत दिला ‘हा’ इशारा
नवी दिल्ली: भारतातील कोरोनाच्या संसर्गाबद्दल दररोज नवीन माहिती समोर येत आहे. जागतिक आरोग्य संघटनेने (डब्ल्यूएचओ) हवेमार्फत हा प्राणघातक विषाणू पसरत असल्याच्या माहितीला दुजोरा दिल्यानंतर आता केंद्रीय आरोग्य मंत्रालयाने धूम्रपान करणार्‍यांना इशारा दिला आहे. आत्तापर्यंत धूम्रपान आणि धूम्रपानातून होणार्‍या इतर प्रकारच्या आजारांच्या बातम्या आपण नेहमीत वाचत, ऐकत आलो आहोत, परंतु आता मंत्रालयाने एक निवेदन जारी करत धूम्रपान करणार्‍यांना कोरोनाचा धोका असल्याचे सांगत गंभीर इशारा दिला आहे.
केंद्रीय आरोग्य मंत्रालयाच्या मते, धूम्रपान करणार्‍यांना कोरोनाचा संसर्ग होण्याची शक्यता जास्त असते. याचे कारण म्हणजे, धूम्रपान केल्यामुळे कोविड -१९ चा विषाणू आपल्या बोटांद्वारे आपल्या तोंडात जाऊ शकतो. आणि यामुळे धूम्रपान करणाऱ्या व्यक्तीला त्रास होतो. कोरोनाचा संसर्ग हवेमार्फत देखील होऊ शकतो, असा दावा जगभरातील एकूण ३२ देशांमधील १५० हून अधिक शास्त्रज्ञांनी केला होता. त्यानंतर जागतिक आरोग्य संघटनेने देखील कोरोना विषाणूचा संसर्ग हवेच्या माध्यमातून होऊ शकतो या शास्त्रज्ञांच्या दाव्याला दुजोरा दिला होता.
कोरोना विषाणूचा संसर्ग काही विशिष्ट ठिकाणी हवेतून पसरला जाऊ शकतोअशी भीती जागतिक आरोग्य संघटनेच्या मार्गदर्शक सूचनांमध्ये व्यक्त केली जात आहे. त्यामध्ये गर्दीच्या ठिकाणी तसेच रेस्टॉरंट्स आणि फिटनेस क्लासेसमध्ये हवेच्या माध्यमातून कोरोना विषाणूचा प्रसार झाल्याची माहिती मिळाली आहे. करोना विषाणूचा संसर्ग झालेल्या एखाद्या व्यक्तीस बंद ठिकाणी दीर्घकाळ राहिल्यामुळे कोरोना विषाणूचा प्रसार त्या ठिकाणी हवेतून होऊ शकतो अशी भीती देखील व्यक्त केली जात आहे.
दरम्यान, भारतात करोनाचा संसर्ग झापाट्याने होत आहे. देशभरात गेल्या २४ तासात ४८,५१३ करोना रुग्ण वाढले असून २४ तासात ७६८ रुग्णांचा मृत्यू झाला आहे. त्याच प्रमाणे देशात एकूण करोनाबाधित रुग्णांची संख्या १४,८३,१५७ वर पोहोचली आहे. संपूर्ण देशात एकूण सक्रिय (ज्यांच्यावर उपचार सुरू आहेत असे) रुग्णांची संख्या ५,०९,४४७ वर पोहोचली आहे. तर देशातील एकूण रुग्णांपैकी ९,८८,०३० रुग्ण बरे झाले आहेत. तसेच आतापर्यंत एकूण ३४,१९३ रुग्णांचा मृत्यू झाला आहे.
