मनसेने साजरा केला उद्धव ठाकरेंचा वाढदिवस!

27 July :- मुख्यमंत्री उद्धव ठाकरे यांचा आज वाढदिवस आहे.राज्यावर कोरोनारूपी आलेले मोठे संकट लक्षात घेता यावर्षी उद्धव ठाकरेंनी वाढदिवस साजरा करणार नसल्याचे जाहीर केले.राजकीय नेत्यांना,मित्र परिवाराला,कार्यकर्त्यांना मातोश्रीवर वाढदिवस साजरा करण्यास येऊ नका असं आवाहनही उद्धव ठाकरेंनी केले.यामुळे उद्धव ठाकरेंच्या निकटवर्तीयांनी,राजकीय नेत्यांनी,मित्रपरिवाराने फोन वरून,सोशल मीडियावरून उद्धव ठाकरेंना शुभेच्छा देत वाढदिवस साजरा केला.मात्र अशातच राज ठाकरे यांच्या मनसेनंही उद्धव ठाकरेंच्या वाढदिवसाचं निमित्त साधत एक अनोखं आंदोलन केलं आहे.

चंद्रपूर जिल्ह्यातील मनसेच्या कार्यकर्त्यांनी आज केक कापून आणि मिठाई वाटून मुख्यमंत्र्यांचा वाढदिवस साजरा केला. मुख्यमंत्री उद्धव ठाकरे यांचा हा वाढदिवस महावितरणच्या मुख्य कार्यालयात साजरा करण्यात आला. मात्र हा वाढदिवस म्हणजे मनसेच्या आंदोलनाचा एक भाग होता.लॉकडाऊनच्या काळात लोकांना विजेची भरमसाठ बिलं आली आहेत. मात्र ऊर्जामंत्री नितीन राऊत उलटसुलट वक्तव्य करून लोकांच्या जखमेवर मीठ चोळत आहे. त्यामुळे मनसेच्या कार्यकर्त्यांनी मुख्यमंत्र्यांकडे वीज बिलात दिलासा देण्याची मागणी करत त्यांना दीर्घायुष्य लाभो अशी प्रार्थना केली आहे.