‘पॉझिटिव्ह’ चालकाला सोडून बँकेचे अधिकारी पळाले
औरंगाबाद – वाहन चालकाची करोना चाचणी ‘पॉझिटिव्ह’ आल्यामुळे त्याच्याबरोबर आलेले बँक अधिकारी चालकाला सोडून आपल्या गावाला निघून गेल्याचा प्रकार शुक्रवारी झाल्टा फाटा येथील ‘एन्ट्री पॉइंट’वर घडला.
त्याचे असे झाले की, सोलापूरहून एका बँकेचे दोन अधिकारी स्वतंत्र वाहनातून काही कामासाठी औरंगाबादला येत होते. झाल्टा फाटा येथे महापालिकेच्या पथकाने त्यांची गाडी थांबवली. गाडीमध्ये चालकासह अन्य दोन जण होते. महापालिकेच्या पथकाने या सर्वांची ‘अॅन्टिजन’ चाचणी केली. त्यात वाहन चालक ‘करोना पॉझिटिव्ह’ असल्याचे स्पष्ट झाले. सोबतचे अधिकारी ‘निगेटिव्ह’ निघाले, परंतु त्यांनी ‘करोना पॉझिटिव्ह’ वाहन चालकाची धास्ती घेतली आणि ते वाहन चालकाला तेथेच सोडून गाडी घेऊन सोलापूरकडे रवाना झाले. महापालिकेच्या कर्मचाऱ्यांनी वाहन चालकाला ‘कोविड केअर सेंटर’मध्ये दाखल केले.
पुण्याहून एक व्यक्ती आपल्या वडिलांसह औरंगाबाद मार्गे बुलडाणा येथे जाण्यासाठी निघाले. त्यांना महापालिकेच्या पथकाने नगरनाका येथे थांबविले व ‘अॅन्टिजन टेस्ट’ करून घेण्यास सांगितले. या चाचणीत त्या व्यक्तीचे वडील ‘करोना पॉझिटिव्ह’ असल्याचे स्पष्ट झाले. त्यांना ‘कोविड केअर सेंटर’मध्ये दाखल करण्यात आले. त्यांच्या मुलाला ‘क्वारंटाइन सेंटर’मध्ये पाठविण्यात आले.
दौलताबाद टी पॉइंटवर चाळीसगावहून दुचाकीवर आलेल्या दोघांना ‘अॅन्टिजन टेस्ट’साठी थांबवण्यात आले. दोघांचीही चाचणी करण्यात आली. त्यांचे अहवाल ‘करोना पॉझिटिव्ह’ आले. त्यामुळे त्यांना ‘कोविड केअर सेंटर’मध्ये पाठवण्यात आले. हर्सूल टी पॉइंटवर देखील दोन प्रवासी खासगी वाहनाने औरंगाबादेत येत होते. ‘अॅन्टिजन’ चाचणी केल्यावर ते दोघेही ‘पॉझिटिव्ह’ आले, अशी माहिती आरोग्य वैद्यकीय अधिकारी डॉ. नीता पाडळकर यांनी दिली.
