सूनेनं दिली सासूला धमकी; गळाही आवळला

पुणे: पुण्यात एक धक्कादायक प्रकार समोर आला आहे. केबल बंद असल्याची विचारणा केल्यानं सूनेनं सासूचा गळा आवळला. तसंच तिला संपवून टाकण्याची धमकी दिली. याबाबत सासूने सूनेविरुद्ध पोलीस ठाण्यात तक्रार केली आहे.

पुण्यातील उजव्या भुसारी कॉलनीतील आकाश अपार्टमेंटमध्ये ही धक्कादायक घटना घडली. सूनेने तिच्या सासूला संपवून टाकण्याची धमकी दिली. तसेच तिचा गळा दाबून शिवीगाळ केली. इतकंच नाही तर तिच्या हातालाही चावा घेतला. या घटनेनंतर सासूने पोलीस ठाण्यात धाव घेतली. तिने सूनेविरोधात कोथरुड पोलीस ठाण्यात तक्रार दिली आहे. पोलिसांनी सूनेविरोधात गुन्हा दाखल केला आहे.

याबाबत ५९ वर्षीय सासूने तक्रार दिली आहे. सविस्तर माहिती अशी की, घरातील केबल बंद होता. त्याबाबत केबलवाल्याकडे तक्रार केली का? अशी विचारणा सासूने सूनेला केली. त्याचा तिला राग आला. यावरून तिनं सासूला शिवीगाळ करण्यास सुरुवात केली. त्यानंतर घरात आदळआपट केल्याचे महिलेने तक्रारीत म्हटले आहे, अशी माहिती पोलिसांनी दिली. सूनेनं रागाच्या भरात सासूचा गळा आवळला आणि त्यांना संपवून टाकण्याची धमकी दिली. तसेच त्यांच्या डाव्या हाताचा चावा देखील घेतला, असेही तक्रारीत नमूद केले आहे. या प्रकरणाचा अधिक तपास कोथरूड पोलीस करत आहेत.