‘कोरोनिल’च्या विक्रीला महाराष्ट्रातही बंदी; बाबा रामदेव यांना झटका
मुंबई: योगगुरू बाबा रामदेव यांच्या पतंजली संस्थेने लॉन्च केलेल्या ‘कोरोनिल’ या करोनावरील औषधांवर राजस्थान सरकारने बंदी घातलेली असतानाच आता महाराष्ट्र सरकारनेही या औषधावर बंदी घातली आहे. महाराष्ट्रात कोरोनिल औषधांची विक्री करण्यास मनाई करण्यात येत आहे, असं गृहमंत्री अनिल देशमुख यांनी म्हटलं आहे. त्यामुळे बाबा रामदेव यांच्यासाठी हा मोठा झटका मानला जात आहे.
गृहमंत्री अनिल देशमुख यांनी ट्विट करून बाबा रामदेव यांनी तयार केलेल्या कोरोनिल या औषधावर बंदी घालण्यात येत असल्याचं स्पष्ट केलं आहे. कोरोनिलच्या क्लिनिकल ट्रायल बाबत कोणताही पुरावा नाही. जयपूर येथील नॅशनल इन्स्टिट्यूट ऑफ मेडिकल सायन्स या औषधाचं क्लिनिकल ट्रायल करण्यात आलं होतं की नाही, याचा शोध घेणार आहे. त्यामुळे महाराष्ट्रात कोरोनिलची विक्री होणार नाही, असं सांगतानाच महाराष्ट्र सरकार राज्यात नकली औषधांच्या विक्रीला कदापीही परवानगी देणार नाही, हा आम्ही बाबा रामदेव यांना इशारा देत आहोत, असं देशमुख यांनी म्हटलं आहे. त्यामुळे महाराष्ट्रात कोरोनिल औषधांची विक्री होणार नसल्याने बाबा रामदेव यांना मोठा आर्थिक फटका बसण्याची शक्यता आहे.
तर करोनावरील रामबाण उपाय म्हणून कोणीही कोणत्याही औषधांचा दावा करून त्या औषधांची विक्री केल्यास विक्रेत्यांवर गुन्हे दाखल करण्यात येणार असल्याचं राजस्थान सरकारने या आधीच स्पष्ट केलं आहे. या आधी आयुष मंत्रालयानेही बाबा रामदेव यांच्या या औषधावर प्रश्नचिन्हं उपस्थित केले होते. तसेच बाबा रामदेव यांच्या या औषधाच्या जाहिरातीवरही बंदी घालण्यात आली होती. आयुष मंत्रालयाकडून या औषधाची चौकशीही करण्यात येत आहे. कुणी करोनाच्या नावावर औषध बनवून त्याचा प्रचार आणि प्रसार करू शकत नाही, असे केंद्र सरकारचे निर्देश आहेत. तसंच आयुष मंत्रालयाच्या वैधतेनंतरच करोनावरील औषधांच्या विक्रीला परवानगी असेल, असंही केंद्राने आधीच स्पष्ट केलेलं आहे. उत्तराखंडमधील आयुर्वेद ड्रक्स लायसन्स अथॉरिटीकडून पतंजलीला नोटीस पाठवण्यात आली. या प्रकरणी पतंजलीकडून स्पष्टीकरण मागवण्यात आलं आहे.
उत्तराखंडच्या आयुर्वेद विभागानेही पतंजलीचं हे औषध चुकीचं असल्याचं म्हटलं होतं. खोकला, सर्दीच्या औषधांच्या निर्मितीचं लायसन्स घेऊन पतंजलीने करोनावरील औषध बनवल्याचं आयुर्वेद विभागाने म्हटलं होतं. दरम्यान, बाबा रामदेव यांनी आम्ही निर्माण केलेलं औषध हे करोनावरचंच असल्याचा दावा केला आहे. या औषधाने रुग्ण बरा होण्याचा दावाही त्यांनी केला आहे.
