बिल्डरच्या घरात चोरी, पत्नीच निघाली मास्टरमाइंड
नवी मुंबई :- कोपरखैरणे येथील एका बिल्डरच्या घरात झालेल्या चोरीच्या घटनेचा छडा पोलिसांनी लावला आहे. गुन्ह्याचा मास्टरमाइंड कोण आहे हे पोलीस तपासात स्पष्ट झाल्यानंतर पोलीसही हैराण झाले.
कोपरखैरणे परिसरात राहणाऱ्या एका बिल्डरच्या घरात चोरी झाली होती. चार लाख रुपये किंमतीचा मुद्देमाल लांबवला होता. याबाबत बिल्डरने पोलिसांत तक्रार दाखल केली होती. पोलिसांनी तात्काळ तपास सुरू केला. त्यावेळी या चोरीमागील मास्टरमाइंड दुसरा तिसरा कुणी नसून, या बिल्डरच्या पत्नीनेच आपल्या स्वतःच्या घरात चोरी केल्याचे उघड झाले. बिल्डरच्या पत्नीने कर्ज फेडण्यासाठी ३ लाखाची रोकड आणि १ लाखांहून अधिक किंमतीचे दागिने चोरले होते. बिल्डरला या कर्जाबाबत काहीही माहिती नव्हते, असे पोलिसांनी सांगितले.
घरात पत्नीनेच चोरी केल्याचे उघड झाल्यानंतर बिल्डरने ही तक्रार मागे घेण्याची विनंती केली. त्यामुळे पोलिसांनी या प्रकरणात अटकेची कारवाई केली नाही. पोलिसांच्या माहितीनुसार, १७ जून रोजी बिल्डरने घरात चोरी झाल्याची तक्रार पोलिसांत दिली होती. १५ जूनला सकाळी ११ वाजता बिल्डर आपल्या आजारी पत्नीला घनसोली परिसरातील एका रुग्णालयात घेऊन गेला होता. वारंवार रुग्णालयात जावे लागत असल्याने त्याने रात्री आठ वाजताच्या सुमारास आपल्या पत्नीला त्याच्या मामाच्या घरी सोडले. १७ जून रोजी बिल्डर पत्नीला मामाच्या घरून रुग्णालयात घेऊन गेला. साधारण दुपारी अडीच वाजताच्या सुमारास ते रुग्णालयात गेले होते. त्यानंतर तो ऑफिसला निघून गेला. त्यानंतर संध्याकाळी साडेसातच्या सुमारास त्याने मामाच्या घरून पत्नीला सोबत घेतले आणि ते घरी पोहोचले. पत्नीने घराचा दरवाजा उघडल्यानंतर आतील साहित्य अस्ताव्यस्त पडले होते. सोन्याचे दागिने आणि रोकडही चोरीला गेली होती.
बिल्डरने याबाबत कोपरखैरणे पोलिसांत तक्रार दाखल केली. पोलिसांनी तपास सुरू केला. परिसरातील सीसीटीव्ही फुटेज तपासले. शेजारील व्यक्तींकडे चौकशी केली. मात्र, कोणताही पुरावा हाती लागला नाही. दुसरीकडे पत्नीकडेही चौकशी केली. मात्र, ती वारंवार आपला जबाब बदलत होती. त्यामुळे पोलिसांना तिचा संशय आला. पोलिसांनी अधिक चौकशी केली असता, तिने पैसे आणि दागिने चोरले असल्याची कबुली दिली. तीन लाख रुपयांचे कर्ज फेडण्यासाठी चोरी केल्याचे तिने सांगितले.
