करोनाबाधितावर दोन महिने उपचार; रुग्णालयाकडून ८ कोटींचे बिल
वॉशिंग्टन: तब्बल दोन महिने करोनाच्या संसर्गाशी लढा दिल्यानंतर प्रकृती बरी झालेल्या रुग्णाचा आनंद क्षणिकच ठरला. करोना आजारावरील उपचारासाठी रुग्णालयाने तब्बल आठ कोटी १४ लाखांचे बिल रुग्णाच्या कुटुंबीयांकडे दिले. रुग्णालयाचे बिल पाहून कुटुंबीयांचे डोळे पांढरे होण्याची वेळ आली होती.
सिएटल टाइम्सने दिलेल्या वृत्तानुसार, सिएटल येथील इस्सक्वाह उपनगरातील स्विडीश मेडिकल सेंटर रुग्णालयात मायकल फ्लोर यांच्यावर उपचार सुरू होते. करोनाच्या संसर्गामुळे त्यांची प्रकृती ढासळली होती. मायकल यांची पत्नी आणि त्यांच्या मुलानेदेखील ते पुन्हा घरी येतील याची आशाच सोडली होती. मायकल यांच्यावर ६२ दिवस रुग्णालयात उपचार सुरू होते. करोनाच्या संसर्गावर त्यांनी यशस्वीरीत्या मात केली. सर्वाधिक काळ उपचार सुरू असणारे ते एकमेव करोनाबाधित ठरले. मात्र, रुग्णालयाने त्यांना ११ लाख डॉलरचे बिल दिले.
सिएटल टाइम्सने दिलेल्या वृत्तानुसार, फ्लोर यांच्याकडे आरोग्य विमा आहे. त्यामुळे साधारणपणे सहा हजार डॉलर रुपये त्यांना भरावे लागतील. विम्यातील तरतुदीनुसार इतर खर्च संबंधित विमा कंपनी रुग्णालयाला देणार असल्याचे म्हटले आहे. तर, अमेरिकन खासदारांनी दिलेल्या माहितीनुसार, कोविड-१९ च्या रुग्णांसाठी विशेष कायदा संमत झाला असून त्यानुसार त्यांना रुग्णालयाचे कोणतेही शुल्क भरावे लागणार नसल्याचे त्यांनी सांगितले.
दरम्यान, करोनावर मात करणे हा माझ्यासाठी चमत्कारीक अनुभव असल्याचे मायकल फ्लोर यांनी सांगितले. प्रकृती ढासळल्यानंतरही जीवित राहणे हे माझ्यासाठी आश्चर्यजनक असल्याचे त्यांनी सांगितले. अमेरिकेतील आरोग्य व्यवस्थेच्या खासगीकरणामुळे गरीब करोनाबाधितांना उपचार घेणे जिकरीचे जात असल्याची टीका करण्यात येत होती. त्यानंतर अमेरिकन सरकारने करोनाबाधितांच्या उपचाराबाबत अनेक निर्णय घेत विशेष करोना पॅकेज जाहीर केले होते.
