औरंगाबाद: हर्सुल तुरुंगातील २ करोनाबाधित कैदी झाले फरार

औरंगाबाद :- हर्सुल कारागृहातील करोना पॉझिटिव्ह असलेले दोन कैदी पसार झाल्याची धक्कादायक माहिती उघड झाली आहे. रविवारी रात्री (७ जून) रात्री अकरा वाजेच्या दरम्यान किलेअर्क वसतिगृहातील क्वॉरंटाइन रूमच्या खिडकीचे लोखंडी गज वाकवून दोघांनी पळ काढला. अक्रम खान (वय २७) रा. जटवाडा आणि सय्यद सैफ (२४ रा. कटकट गेट) असे दोघा कैद्यांचे नाव आहे.

या प्रकरणात कारागृह पोलिसांनी दिलेल्या माहितीनुसार, दोन दिवसांपूर्वी मध्यवर्ती कारागृहातील २९ कैद्यांना करोनाचा संसर्ग झाल्याचा अहवाल मिळाला होता. या अहवालानंतर किलेअर्क भागातील सामाजिक विभागाच्या वसतिगृहात १९ कैद्यांना उपचारासाठी ठेवण्यात आले होते. या वसतिगृहाच्या पहिल्या मजल्यावर या कैद्यांना ठेवण्यात आले होते. या कैद्यांच्या सुरक्षेसाठी सहा मध्यवर्ती कारागृहाचे पोलीस आणि एका अधिकाऱ्याला तैनात करण्यात आले होते. या ठिकाणी असलेल्या रूममध्ये करोना पॉझिटिव्ह कैद्यांना ठेवण्यात आले होते. यापैकी एका रूममधील खिडकीचे लोखंडी गज वाकवून अक्रम खान आणि सय्यद सैफ या दोघांनी रविवारी रात्री अकरा वाजेच्या सुमारास पळ काढला.

दोन कैदी पळून जात असल्याचे कळताच, मध्यवर्ती कारागृहातील पोलिसांनी या दोघांचा पाठलाग केला. रात्रीच्या अंधारात हे दोघे जण हिमायत बागच्या परिसरात शिरले. तेथून हे दोघे पळून जाण्यात यशस्वी झाले. या प्रकरणानंतर बेगमपुरा पोलीस ठाण्यात या दोन्ही करोना पॉझिटिव्ह कैद्यांच्या विरोधात गुन्हा दाखल करण्यात आला आहे. मध्यवर्ती कारागृहाचे पोलीस कर्मचारी आणि शहर पोलीस विभागाकडून या दोन्ही करोना पॉझिटिव्ह कैद्यांचा शोध सुरू आहे.

चौकशीसाठी समिती नियुक्त

या कैद्यांची जबाबदारी असलेल्या एका कारागृह पोलीस कर्मचाऱ्याला हर्सुल कारागृह अधीक्षक यांनी तत्काळ निलंबित केले असल्याची माहिती सूत्रांनी दिली आहे. निलंबित केलेल्या कर्मचाऱ्याचे नाव प्रशांत देवकर असे आहे. तर या प्रकरणाच्या चौकशीसाठी एक सदस्यीय समितीही नियुक्त करण्यात आली आहे.

खूनाच्या गुन्ह्यातील आरोपी

क्वारंटाइन सेंटरमधून पळालेले दोन करोना पॉझिटिव्ह कैद्यांपैकी अक्रम खान अय्यान खान (२७) रा. जटवाडा हा कैदी खून प्रकरणातील आरोपी आहे. तर सय्यद सैफ सय्यद असद (२४) हा कैदी फसवणूक प्रकरणातील आरोपी आहे.

औरंगाबादेतील करोना रुग्णांची संख्या २०६९

दरम्यान, बायजीपुरा भागातील ६३ वर्षीय करोनाबाधित रुग्णाचा सोमवारी सकाळी मृत्यू झाल्याने जिल्ह्यातील करोनाबाधितांच्या मृत्यूंची संख्या १०५ झाली आहे. तसेच शहर परिसरात चार नवे बाधित आढळून आल्याने जिल्ह्यातील करोनाबाधितांची संख्या २०६९ झाली आहे.