राज ठाकरे यांच्याविरोधात अटक वॉरंट जारी

6 Jan :- मनसे अध्यक्ष राज ठाकरे यांच्याविरोधात परळी न्यायालयाने अजामीनपात्र वॉरंट जारी केले आहे. 2008 सालच्या एका प्रकरणात जामीन मिळूनही सतत तारखेला न्यायालयात गैरहजर राहिल्यामुळे न्यायालयाने हा निर्णय घेतला आहे. त्यावेळी परळीत एका बसवर दगडफेक केली होती. त्यावेळी राज ठाकरेंवर चार्जशीट दाखल करण्यात आली होती.

या प्रकरणातील सर्व आरोपींना जामीन मिळाला होता. मात्र ते गैरहजर राहीले होते. 2008 साली राज ठाकरे यांना मुंबई येथे अटक झाली होती, याचे पडसाद संपूर्ण महाराष्ट्रात उमटले होते. परळीत देखील मनसेनेच्या कार्यकर्त्यांनी राज ठाकरे यांच्या अटकेचा निषेध केला. यादरम्यान, कार्यकर्त्यांनी सार्वजनिक वाहतूक असणाऱ्या एसटी महामंडळाच्या बसेवर धर्मापुरी पॉइंट येथे दगडफेक केली.

दगडफेकीत बसचे समोरील काच फुटून सार्वजनिक मालमत्तेचे नुकसान झाले होते. त्यामुळे बीडच्या परळी ग्रामीण पोलिस स्थानकात राज ठाकरे आणि कार्यकर्त्यांविरोधात जमाबंदीचे उल्लंघन करणे, सार्वजनिक मालमत्तेचे नुकसान, चिथानणीखोर भाष्य केल्याप्रकरणी कार्यकर्त्यांविरोधात गुन्हे दाखल करण्यात आले होते.