सहा वर्षीय मुलीवर रिक्षा चालकाचा बलात्कार!
ZunjarNeta Live! वर प्रेस करून ज्वाईन करा वॉट्सअप्प ग्रुप
पुणे रेल्वे स्टेशन परिसरातून १४ वर्षीय मुलीचे अपहरण करून तिच्यावर सामूहिक बलात्कार केल्याच्या घटनेला आठ दिवस होत नाही, तोच आज आणखी एक संतापजनक घटना पुण्यात घडली आहे. रेल्वे स्टेशन परिसरातील एसटी स्थानकाच्या फुटपाथवर आईच्या कुशीत झोपलेल्या सहा वर्षीय चिमुकलीला उचलून नेऊन तिच्यावर बलात्कार केल्याची घटना समोर आली आहे. या घटनेतील आरोपी रिक्षाचालकाचे नाव सागर मांढरे (वय-३९) असे आहे.
झोन दोनचे पोलीस उपयुक्त सागर पाटील यांनी दिलेल्या माहितीनुसार, बुधवारी रात्रीच्या सुमारास पुणे स्टेशन येथील एसटी स्थानकाच्या जवळ असलेल्या फुटपाथावर एक कुटुंब झोपले होते. तिथे आईच्या बाजूला एक सहा वर्षाची मुलगी झोपली होती. त्यावेळी आरोपी रिक्षाचालक सागर मांढरे याने त्या मुलीला उचलून, रिक्षाच्या मागील बाजूला ठेवले आणि रिक्षा सुरू करून पुढे निघून गेला. हा प्रकार तेथील एका रिक्षा चालकांने पाहताच, त्यांनी पोलिसांना माहिती कळविली व त्या रिक्षाचालकाचा पाठलाग केला. मात्र अंधारामुळे रिक्षाचालक पुढे कुठे गेला हे त्याला दिसून आले नाही.
दरम्यान, आरोपी रिक्षाचालक सागर मांढरे याने त्या मुलीला सातारा रोडवरील एका इमारतीवर नेऊन तिच्यावर अत्याचार केला. आरोपीचा शोध विविध पथकाच्या माध्यमातून सुरू असताना. सातारा रोडवर सहा वर्षाची मुलगी सापडली. त्यानंतर काही मिनिटात आरोपीला पकडून, त्याच्या विरोधात गुन्हा दाखल करण्यात आला असल्याची माहिती पोलिसांनी दिली.
