शेतकर्यांच्या मुलाचा रोटरमध्ये अडकून मृत्यू

कळंब- शेतात रोटर सुरू असताना चालकाचा ताबा सुटल्याने ट्रॅक्टर विनाचालक शेतात चालत होते.सदर ट्रॅक्टर विहिरीत कोसळेल अशी शक्यता वाटल्याने शेतकर्यांचा १७ वर्षीय मुलगा ट्रॅक्टर थांबवण्यासाठी धावला मात्र,दुर्देवाने तो ट्रक्टरखाली सापडला.यात रोटरमध्ये अडकून त्याचा मृत्यू झाल्याची घटना तालुक्यातील करंजकल्ला येथे दि २५ मे रोजी संध्याकाळी ६ च्या सुमारास घडली आहे.

याविषयी पोलिसांकडून मिळालेली माहिती अशी की, तालुक्यातील करंजकल्ला येथील नितीन पवार यांच्या शेतजमिनीची उन्हाळी मशागत सुरू होती. यासाठी जमीन रोटर करण्यासाठी एका नातलगाचे ट्रॅक्टर आणले होते.गावालगतची जमीन रोटर झाल्यानंतर लोहटा पश्चिम शिवारातील जमीन रोटर करणं सुरू होतं.ट्रॅक्टरवरील चालक हे काम करत असताना अनिकेत उर्फ आबा नितीन पवार हा शेतकर्यांचा मुलगा मागेपुढे पाहत होता.

दरम्यान,साडेआठच्या सुमारास अचनाक रोटर चालू असलेल्या ट्रॅक्टरचा चालक खाली कोसळले. यानंतर नियंत्रण सुुुटल्याने ट्रॅक्टर मात्र विनाचालक जमिनीत चालत होते.हा प्रकार अनिकेत याच्या लक्षात आला.त्यातच सदर ट्रॅक्टर विनाचालक विहिरीचे दिशेने जात होते.यामुळे प्रसंगावधान राखत अनिकेत यांने ट्रॅक्टर थांबवण्यासाठी चालत्या ट्रक्टरवर चढण्याचा प्रयत्न केला.

मात्र, यावेळी अनिकेत दुर्देवाने ट्रॅक्टरखाली सापडला गेला.पुढे रोटरमध्ये अडकल्याने त्याचा मृत्यू झाला.या घटनेमुळे मोठी हळहळ व्यक्त केली जात आहे.दरम्यान, शिराढोण पोलिस ठाण्यात नितीन पवार यांनी दिलेल्या माहितीनुसार आकस्मिक मृत्यूची नोंद करण्यात आली आहे