19 मार्चपासून 8 वाजता लागणार संचारबंदी
जिल्हाधिकाऱ्यांनी दिली माहिती
17 March :- औरंगाबाद जिल्ह्यात कोरोनाच्या वाढत्या रुग्णांमुळे आता 9 नाही तर 8 वाजल्यापासूनच रोज रात्रीची संचारबंदी लागू केली जाणार आहे. जिल्हाधिकारी सुनील चव्हाण यांनी 19 मार्चपासून नवीन नियम लागू होणार असल्याची माहिती दिली. उल्लेखनीय बाब म्हणजे, हा नियम आता संपूर्ण औरंगाबाद जिल्ह्यात लागू केला जाणार आहे. रात्रीच्या संचारबंदीचा आणि आठवड्यातील शनिवार-रविवारची पूर्ण संचारबंदी हा नियम 4 एप्रिलपर्यंत राहील.
‘दै.झुंजारनेता’ वर क्लिक करा आणि मिळवा ‘वॉटसअँपवर’ लाईव्ह अपडेटस
देशात कोरोनाची दुसरी लाट आलेली असताना सर्वाधिक रुग्ण महाराष्ट्रात सापडत आहेत. गेल्या काही दिवसांपासून औरंगाबादेत कोरोनाच्या नवीन रुग्णांचा सरासरी आकडा 1200 पर्यंत पोहोचला. त्यामुळे, ही नवीन उपाययोजना केली जात आहे. यापूर्वी लागू करण्यात आलेल्या रात्रीच्या संचारबंदीच्या नियमांमध्ये केवळ रात्री 9 ऐवजी 8 वाजल्यापासून सकाळी 5 वाजेपर्यंत संचारबंदी असा बदल करण्यात आला आहे. जिल्ह्यात पूर्वी सांगितल्याप्रमाणेच अत्यावश्य सेवा, वैद्यकीय सेवा अर्थात रुग्णालये आणि औषधालय सुरूच राहतील. यासोबतच दूध विक्री, पेट्रोल-डीझेल, गॅस एजन्सी आणि वृत्तपत्र इत्यादींनाही आधीप्रमाणेच सूट राहील असेही सांगण्यात आले आहे.
हॉटेल, बार, रेस्टॉरंट, परमिट रूम, खाद्यपदार्थांची दुकाने रात्री 8 वाजेपर्यंत खुली ठेवता येतील. एकूण क्षमतेच्या फक्त 50 टक्के ग्राहकांना बसण्याची मुभा. यानंतर एक तास पार्सल सुविधा देता येईल.
खासगी कार्यालये बंद. सरकारी कार्यालये सुरू.
शनिवार-रविवारी सर्व बाजारपेठ, मॉल, चित्रपटगृहे, हॉटेल्स बंद. होम डिलिव्हरी सुरू राहील.
सामाजिक, धार्मिक, कार्यक्रम, मोर्चे-आंदोलने, आठवडे बाजार, स्विमिंग पूल, क्रीडा स्पर्धा बंद. खेळाडूंनी नियमांचे पालन करून सराव करावा.
शाळा, महाविद्यालये, कोचिंग संस्था, इतर शैक्षणिक संस्था बंद. ऑनलाइन शिकवण्यांचा पर्याय सुरू.
राष्ट्रीय, राज्य, विद्यापीठ पातळीवरील ज्या परीक्षा यापूर्वी जाहीर झाल्या आहेत, हॉतिकिटे वाटप झाले आहे त्यांना मार्गदर्शक सूचनांचे पालन करून घेता येईल. वाचनालयांमध्ये क्षमतेच्या 50 टक्के लोकांनाच प्रवेश देता येईल.
4 एप्रिलपर्यंत जिल्ह्यातील सर्व मंगल कार्यालये बंदच राहतील. या तारखांदरम्यान ज्यांचे विवाह ठरले आहेत त्यांच्यासाठी रजिस्टर मॅरेजचा पर्याय खुला राहील.
